反覆練習，達致完美。
好多人覺得守門員係唔使練，射下佢就得。不過踢只係練習其中一部分。甚至係相對近似真實嘅比賽情況。但如果真係識打龍門，或者身邊有朋友係打龍門。咁就會知道龍門其實有好多野練。
根據觀察，守門員嘅技術比場區球員多近一倍或以上。加上而家龍門要擁有場區球員嘅技術，簡單嘅控球長短傳，甚至控球轉身，以及盤球擺脫對手。去到接波或者飛撲，當中包含嘅技術更多。每個動作，要做得精準。涉及手法，跳，跑，移。每個動作環環相扣，加上需要眼，手，腳協調。要減低比賽犯錯，唯有必須透過練習改進。
練習除左可以提升熟練度，透過反覆練習令肌肉產生記憶。而且令到動作穩定性更高，應用時可以透過自然反應於最短時間內作出反射。咁先可以喺比賽中那零點幾秒內作出反應。
透過練習找出錯誤，特別守門員嘅錯誤多數都係姿勢，例如接波動作，起手速度是否一致，角度是否迎向來球路線，以及手型，甚至接球力量等。都要透過訓練去搵原因。改善及調整。先減低比賽時犯錯機會。特別一啲低級犯錯，例如接波甩手或者痾蛋，職業門將犯錯較少，但當出現低級錯誤，大部分成因都係不集中以及輕視。相對業餘守門員，由於練習時數低，甚至沒有練習。令本身動作錯誤或者動作穩定性不足，因而出現錯誤。
亦因為缺乏練習，下下都「真槍實彈」上陣。令到錯誤往往出現。而不停重覆練習令深化肌肉記憶，透過練習更調整改善動作穩定性。仲有練習嘅時候要不停修正，搵出正確姿勢再反覆練習，成效會更大。成日都會同學生講一番話「唔係唔練，錯嘅練一百次以上都係錯」。亦因為肌肉會有記憶，假如「記低」錯嘅動作，亦都要透過訓練調整，當中所用時間以及心力會更多。
當大家睇到片中嘅守門員動作穩定性咁高。當中每一個動作都累積極高時數而得出黎嘅表現。每一個動作嘅流暢度，穩定性等都係反覆練習嘅成果。
當你去羨慕人地幾勁嘅時候，不如比多啲時間去練習你嘅技術。相對累積得一定時數，你都可以擁有佢地嘅能力。
緊記「反覆練習，達致完美」。
Search